🐘हत्ती - १🐘(चित्रं मालिका)

 🐘हत्ती - १🐘

(चित्रं मालिका)

🐘🐘

आने बंथोंदू आने - हत्ती आला हत्ती  

नोड बन्नी आने - हत्ती बघायला या  

कप्प बण्णद आने - काळ्या रंगाचा हत्ती 

दोड्ड होट्टद आने -  मोठ्या पोटाचा हत्ती

आने बथोंदू आने - हत्ती आला हत्ती  

सण्ण कण्णीद आने - लहान डोळ्यांचा हत्ती  

आगला किवीद आने - मोठ्या कानाचा हत्ती

उद्द सोन्डीद आने - लांब सोंडेचा हत्ती  

आने बंथोंदू आने - हत्ती आला हत्ती  

चूप दन्तद आने - तीक्ष्ण दात असलेला हत्ती

मोटू बालाद आने - लहान शेपटीचा हत्ती  

शक्तिशाली आने - शक्तिशाली हत्ती  

आने बंथोंदू आने - हत्ती आला हत्ती

      समजायला लागल्यापासून आपल्याला प्रत्येकाचाच गणपती बाप्पा एकदम लाडका झालेला असतो. तसेच हत्ती सुद्धा विशेष आवडीचा प्राणी असतो. वाघ-सिंह आवडीचे असतातच, पण हत्तीचे आपल्या मनात एक खास स्थान असते. तसेच माझ्याही मनात आहेच. पण काही वर्षांपूर्वी, दक्षिण भारतातील काही हत्ती-विशेष स्थळांना भेट दिली, तेव्हा अगदी भरपूर हत्ती बघायला मिळाले. अगदी छोट्या पिल्लापासून ते पूर्ण वाढ झालेल्या हत्तीपर्यंत सगळे. तसेच बांधून ठेवलेले हत्ती, एका जागी उभे असलेले हत्ती, चालणारे हत्ती, गवत खाणारे हत्ती, रागी मुद्दे खाणारे हत्ती, पाण्यात डुंबणारे हत्ती, हत्तींना माहूत अंघोळ घालतांना. इतकेच नाही तर तिथे प्राणी संग्रहालय, अभयारण्य, जंगल लाॅज वगैरेंची प्रतिक चिन्हात सुद्धा हत्तीच! 

हे सगळे इथेच थांबत नाही. प्रत्येक ठिकाणी स्मरणिका दुकानात वेगवेगळ्या मापाचे आणि निरनिराळ्या माध्यमातील कितीतरी हत्ती विक्रीसाठी ठेवलेले असतात. या व्यतिरिक्त तिथे विक्रीसाठी ठेवलेल्या प्रत्येक वस्तूवर सुद्धा हत्तीच असतात. म्हणजे चावीच्या रिंग्स, मातीचे, लाकडी, सिरॅमिकचे, प्लास्टिकचे, बांबूचे, काचेचे कप आणि तर्हेतर्हच्या वस्तू या सगळ्यावर सुद्धा हत्तीचीच नक्षी असते. टी-शर्ट, जाकीट, पॅन्ट वगैरे वर सुद्धा हत्तीच हत्ती! अगदी हत्ती धुडगूस घालत असतात सगळीकडे, सगळ्या माध्यमातून!

याच दरम्यान, एका प्रतिक चिन्हात मी एक आई आणि पिल्लू हत्ती एकमेकांत गुरफटलेले पाहिले. या माय-लेकांनी केव्हा माझ्या मनात घर केले कळलेच नाही. मनातच नाही तर हृदयात, डोक्यात, मेंदूतही या माय-लेकांनी इतका धुडगूस घातला की ते हातातून बोटात आणि बोटातून कागदावर उतरू लागले अगदी माझ्याही नकळत. काही काळाने या पिल्लाचे बाबा सुद्धा आले. पुढे कुटुंब, मित्र-परिवार आणि अखेरीस अख्खा कळपच! खूपच मज्जा आली या सगळ्यांबरोबर खेळतांना. जाम धमाल केली मी या माझ्या महाकाय मित्रांबरोबर आणि त्यांच्या छोट्या छोट्या गोंडस पिल्लांबरोबर!

आता हे सगळे एक-एक करत आपल्या सगळ्यांच्या भेटीला येत आहेत. आज आई आणि पिल्लू हत्ती! आपणही यांच्या बरोबर धमाल करा! 

सोबतच वर एक छोटीशी बाल-कविता/बडबड गीतही! हे मूळ कानडी भाषेतील आहे. याच काळात मी लहान मुलांच्या शाळेत काम केले. तेव्हा ही बाल-कविता आम्ही सगळे रोज म्हणत असू. माझी फारच आवडती बाल-कविता आहे ही. सोबतच मराठीत अर्थ सुद्धा दिलेला आहे. त्यात काही व्याकरणाच्या चुका असू शकतील. त्याबद्दल आधीच माफी मागते. सोबतच त्याची एक तु-नळी साखळी(you-tube link 🤭🙃😝) सुद्धा देत आहे. ऐका, बघा, आवडेल आपणा सर्वांनाही.

https://youtu.be/5MpwkEdkZG8

कृष्ण-धवल हत्ती 

आनंदी पाऊस 

(चित्रं मालिका) 

 २४ फेब्रुवारी २०२३