वारसा स्पर्धेच्या निमित्ताने (वारसा स्पर्धा)

 वारसा स्पर्धेच्या निमित्ताने 

                                   या वर्षातील खुप जास्त आणि  वारंवार वापरले जाणारे शब्द म्हणजे 'कोव्हीड-१९' , 'करोना' , 'टाळेबंदी' . आणि यामुळे घरादारातच नाही तर संपुर्ण जगभरातच एक भयानक नकारात्मकता पसरली आहे . अगदी प्रत्येकाची दैनंदिनी पार बदलुन गेलीये . पण या सगळ्या वाईट परिस्थितीत आणि नकारात्मकते मध्ये सुद्धा खुप सकारात्मक गोष्टी घडत आहेत . या सगळ्या गोष्टीबद्दल नंतर सविस्तर लिहिनच . आत्ता फक्त या एका सकारात्मक गोष्टीबद्दल . 

                                   ती म्हणजे वारसा स्पर्धा ! इंटॅक संस्थेचे भारतभर वेगवेगळे विभाग आहेत . हे सगळे विभाग सतत काही ना काही कार्यक्रम राबवत असतात . या कठीण काळात सुद्धा अनेक कार्यक्रम राबविणे सुरूच आहे , या संस्थेचे . अगदी भरभरून माहिती , ज्ञान  मिळते आहे . त्यापैकी सोलापुर विभागाने सुद्धा या काळात एक छान आणि स्त्युत्य कार्यक्रम राबवला . तो म्हणजे ही "वारसा स्पर्धा" ! या स्पर्धेच्या दोन फेऱ्या झाल्या . या दोनही फेऱ्यांमध्ये मी भाग घेतला होता . यात सगळ्या मिळुन मी अकरा प्रवेशिका पाठविल्या होत्या . तर या सगळ्या प्रवेशिका फक्त स्पर्धेच्या प्रवेशिका , नाहीत तर या सगळ्या दस्तावेजीकरणाच्या कामाचा एक महत्वाचा भाग आहे . 

                                  पहिल्या एक दोन प्रवेशिका पाठविल्यानंतर माझे मलाच जाणवले , या स्पर्धेच्या निमित्ताने माझ्याच वारस्याशी , माझी नव्याने आणि खुप वेगळ्या आणि महत्वाच्या दृष्टीकोनातून ओळख झाली . आणि त्या खुपच वेगळ्या दिसल्या , भासल्या . त्या किती महत्वाच्या आहेत याची जाणीव झाली . एरव्ही मला ही जाणीव झाली नसती , त्या दृष्टीने . आणि मग वाटून गेले बक्षीस मिळणे वगैरे फार महत्वाचे नाही . पण या निमित्ताने ही एक वेगळी जाणीव आणि दृष्टी मिळाली आहे . त्यामुळे शक्य तितक्या गोष्टींचे दस्तावेजीकरण होईल , कायमचे . पुढच्या पिढ्यांना सुद्धा त्यांची ओळख होत राहील आणि माहीती मिळेल . 

                                 मग मी शक्य तितक्या गोष्टींचे दस्तावेजीकरण अगदी झपाटून टाकल्या सारखे केले . तेव्हढ्यावरच न थांबता पुढेही केले आणि करत राहण्याचा मानस आहे . चौधरी सदनाच्या दस्तावेजीकरणासोबत , हे ही सगळे दस्तावेजीकरण या स्पर्धेच्या निमित्ताने सुरु झाले आहे . यातील कित्तेक गोष्टी नामशेष झाल्या आहेत , होण्याच्या मार्गावर आहेत . तर या सगळ्या बद्दलचे लिखाण आणि छायाचित्र सुद्धा  या ब्लॉग च्या माध्यमातुन वाचायला उपलब्ध करून देत आहे . स्पर्धेत शब्दांची मर्यादा होती , त्यामुळे तितक्याच शब्दांत विषय लिहावा लागलेला आहे . तसेच त्यात वारसा मुल्यांवर जास्त भर आहे . पण काही गोष्टींचे ब्लॉग मध्ये इतर ठिकाणी उल्लेख आलेले आहेत किंवा पुढेही येत राहतील . त्या ठिकाणी मात्र त्याची बाकी माहिती सुद्धा नक्कीच मिळेल . 

                               इंटॅक संस्थेच्या सोलापुर विभागाचे खुप खुप मनःपुर्वक आभार ! माझ्याच वारस्याची माझ्याशी अशी छान ओळख करून दिल्याबद्दल . या पुढेही अश्याच छान छान उपक्रमांचे आयोजन होत राहील अशी आशा करते आणि शुभेच्छाही देते ! 

©आनंदी पाऊस 

(वारसा स्पर्धा)

१ सप्टेंबर २०२०