🐈🐈वाघाची मावशी🐈🐈

🐈🐈वाघाची मावशी🐈🐈

खरतरं हे उंदीर मामाचे मानाचे दिवस! 

तथापि ह्या वाघाच्या मावश्यांनी प्रचंड धुमाकूळ घातलाय बऱ्याच काळापासून. हत्ती मालिका पूर्ण झाली, वृक्ष मालिका सुद्धा झोकात चालू आहेच. परंतु सुरुवात मनीमाऊच्या मालिकेने झाली होती. बऱ्याचशा मनीमाऊ इथे प्रकाशित झाल्या, तरीही बऱ्याच बाकी आहेत. त्या मला खूपच छळत आहेत. मी झोपली की, एक माझ्या डोक्यावर टुणकन उडी मारते, एक माझ्या पोटावर येऊन बसते, एक पायाशी येऊन झोपते, काम करायला लागले की एखादी पायात घोटाळत असते, लॅपटाॅप घेतला हातात की एखादी बटानांवर येऊन बसते, तर एखादी मांडीवर. आमचा नंबर कधी येणार? असा सततचा प्रश्न विचारत असतात. 

त्यामुळे आज उंदीर मामाचा मान असला तरी आनंदी पावसात मात्र या वाघाच्या मावश्यांचा मान! एक दारा आडून बघतेय कधी नंबर लागतो याची वाट बघत. एक वाट बघून आळसावल्याचे नाटक करतेय लाडात येऊन. तर एक आपल्या समस्त पिल्लांसह माझ्याकडे बघतेय, एक मासा तोंडात धरून पोझ देतेय, एक तर चक्क योग करतेय, दोघी रुसल्याचे नाटक करत एकमेकींकडे पाठ करून बसल्यात, तर हे एक कुटुंब चेहऱ्यावर शून्य भाव असल्याचे आव आणत आहेत. 

त्यामुळे आधीच त्या सगळ्यांना खुश करण्यासाठी ही छानशी कविता! त्याच नाहीतर, आपण सगळेच खुश होऊन जातो ही कविता वाचून-ऐकून! 

🐱मनीमाऊ🐱 

मनीमाऊ, मनीमाऊ,

अंग तुझे किती मऊ!

डोळे तुझे घारे घारे,

मिशीवरून जीभ फिरे.

मखमलीचे मऊ पाय 

चाळून चाळून थकले काय!

पाउल तुझे वाजेना.

चाहूल काही लागेना.

गुपचूप येऊन बसतेस कशी?

डोळे मिटून बघतेस कशी?

इवले इवले तुझे कान 

उभे करून ऐकतेस काय?

उंदीरमामा बिळात बाई,

आता बाहेर यायचा नाही.

दारा आडून वाट बघणारी 

गोड-गोडुली माऊ 

लाडात येऊन आळसावलेली माऊ 

समस्त पिल्लांसह माऊ 

तोंडात मासा धरलेली मनी 

या योग-साधना करीत आहेत 

रुसून एकमेकींकडे पाठ करून बसल्यात 

चेहऱ्यावर शून्य भाव आणल्याचे 

नाटक करणारे माऊ-कुटुंब 

©️आनंदी पाऊस 

१३ सप्टेंबर २०२४