🏃‍♀️🤾‍♀️ऑलिंपिक-२०२४ च्या निमित्ताने 🏋️‍♀️🚴‍♂️ (काही अनुभवलेलं...)

🏃‍♀️🤾‍♀️ऑलिंपिक-२०२४ च्या निमित्ताने 🏋️‍♀️🚴‍♂️

(काही अनुभवलेलं...)

अधिकृत प्रतिक चिन्ह 

                                   ऑलिंपिक-२०२४ चे प्रतिकचिन्ह बऱ्याच आधी पासून बघायला मिळत होते. फारच लक्षवेधी वाटले. मनापसून आवडले. सर्जनशील वाटले. ते निर्माण करणाऱ्या कलाकाराला दाद द्यावीशी वाटली. माझ्या बौद्धिक कुवतीनुसार त्याचा अर्थ लावला. नंतर खरा अर्थ शोधला, अर्थातच आंतरजालात! तो असा, 'According to the official Paris 2024 website, the logo has significant historical meaning - and a name:Marrianne. within the logo are three symbols: the gold medal, the olympic flame, Marrianne the embodiment of The French Republic, bourn out of the 1789 French Revolution. म्हणजेच, अधिकृत पॅरिस २०२४ वेबसाइटनुसार, या प्रतिक चिन्हाचा महत्त्वपूर्ण ऐतिहासिक अर्थ आहे आणि नाव - मारियान. लोगोमध्ये तीन चिन्हे आहेत - सुवर्णपदक, ऑलिम्पिक ज्योत आणि मारियान, फ्रेंच प्रजासत्ताकाचे मूर्त स्वरूप, 1789 च्या फ्रेंच क्रांतीतून जन्माला आले.

                                    मला हे प्रतिकचिन्ह इतके आवडले की, ते काढून बघावेसे वाटले. बऱ्याच निरनिराळ्या पद्धतीने मी, ते रेखाटण्याचा प्रयत्न केला आहे. या लेखनासोबत ती सगळी रेखाटनं सुद्धा जोडली आहेत. खूप आनंद मिळाला मला, हे प्रतिक चिन्ह विविध पद्धतींनी प्रदर्शित करतांना. एका बाजूला ही सगळी चित्रं काढत होते तर दुसरीकडे मनात ऑलिंपिक आणि मी असा निरनिराळ्या पातळीवर विचार सुद्धा चालू होते. बदलत्या काळाचे एक सुंदर चलचित्रंच डोळ्यासमोर तरळत होते. फार रंजक आणि माहितीपूर्ण वाटला हा सगळं प्रवास! 

                                    सर्वात प्रथम ऑलिंपिकची ओळख झाली ती वर्तमानपत्रातून! त्याकाळात स्थानिक पासून जगभरातील माहिती, बातम्या मिळण्याचे एकमेव साधन म्हणजे, वर्तमानपत्र! दूरदर्शन तर सोडाच, दूरध्वनी सुद्धा नव्हते सामान्यानांच्या घरात. त्यामुळे वर्तमानपत्र, लहान-थोर सगळ्यांचेच अतिशय लाडके. तसेच ते आमचे सुद्धा लाडके होते. खेळाची जास्त आवड म्हणजे ताईची. ती विविध खेळांमध्ये कुठल्या नी कुठल्या पातळ्यांवर सहभागी होत असे, अगदी शालेय जीवनापासून. इतकेच नव्हे तर ती अजूनही तिच्या अतिशय व्यस्त दिनक्रमातून वेळ काढून, अगदी नियमित बॅडमिंटन खेळते. तर तेव्हा उपलब्ध एकमेव सामाजिक माध्यमातून शक्य तितक्या खेळा विषयी माहिती ती वाचत असे. तिच्या सोबत मीही थोडीफार. मात्र ऑलिंपिक असले की आम्ही सगळेच लक्ष देऊन बघत असू. सगळेच खेळ, त्यांची नावे वगैरे माहिती नसेलही कदाचित त्यावेळी. अजूनही आहे असे नाही. तथापि त्याकाळी रोजच्या-रोज वर्तमानपत्रात दररोज कुठल्या देशाला किती पदके मिळाली या बाबत माहिती सांगणारा एक तक्ता येत असे. त्यात देशाचे नाव, सुवर्ण पदक, रौप्य पदक, कास्य पदक अशी माहिती दिलेली असे. हे बघण्याची आम्हा सगळ्यांनाच फार इच्छा असे. ज्या दिवशी या तक्त्यात भारताचे नाव येत असे, तेव्हा कोण आनंद होत असे! 

                                    तेव्हा सम संख्येवर माझे फार प्रेम. सगळे जग फक्त सम संख्येवर चालावे असे मला वाटे. अजूनही ही आवड काही प्रमाणात आहेच. उदा. दूरदर्शन संचाचा आवाज सम संख्या किंवा पाचने भाग जाणारी संख्या, सूक्ष्म-लहर-पेटी (मायक्रोवेव्ह) सुद्धा अशाच संख्येवर लावते वगैरे. त्यामुळे लीप इयर मनापासून आवडे, हे सांगणेच नको. सोबतच लक्षात ठेवणे सोप्पे. ज्या वर्षाच्या संख्येला चारने भाग जाईल ते लीप इयर! आणि याच वर्षी ऑलिंपिक! त्यामुळे परीक्षेत ह्यासंबंधी प्रश्न आला, तर ते मार्क पक्के! असे एक नी अनेक! बालपणच ते, सगळ्या धमाल गमती-जमती...

                                      पुढे काही वर्षांनंतर दूरदर्शन संचाचे आगमन झाले. ऑलिंपिक बद्दलच्या बातम्याच काय पण प्रत्यक्ष स्पर्धाच बघायला मिळू लागल्या. सगळ्याच स्पर्धा बघण्यासारख्या! पण त्यातल्या त्यात सगळ्यात आवडता प्रकार म्हणजे उद्घाटन समारंभ, निरोप समारंभ आणि जिमनॅस्टिक्स! बरीच वर्ष शक्य होईल तेव्हा तेव्हा या आणि इतर काही स्पर्धांचा दूरदर्शनवर बघून आनंद घेतला.  पुढे म्हणजे गेल्या ऑलिंपिक पासून, त्याही पुढे प्रगती झालेली आहे. ती म्हणजे ऑलिंपिक-अॅप! एका क्षेत्रातील किती मोठ्या इतिहासाचे आपण साक्षीदार आहोत याची जाणीव झाली! वर्तमानपत्र ते भ्रमणध्वनी-अॅप! या सोबतच सगळ्याच आघाड्यांवर असे बदल झालेले असतील, म्हणजे नवीन खेळ, खेळांची नवीन साधने, कॅमेरा तंत्रज्ञान सगळ्यात महत्वाचे म्हणजे अत्याधुनिक तंत्रज्ञानाने सज्ज अशी क्रीडा-भूमी(स्टेडीअम) वगैरे वगैरे. शिवाय प्रवासाची साधने, वेग. इतक्या थोड्या काळातील हा प्रचंड बदल बघून थक्क व्हायला होते! 

                                     एक वेगळीच दृष्टी प्राप्त झाल्यासारखे वाटतेय, हा सगळा विचार करून. एका वेगळ्याच दृष्टीकोनातून या उत्सवाकडे बघता येईल. आमचे दादा(डॉ रा श्री मोरवंचीकर) म्हणतात तसे, कुठल्याही विषयाचा सर्वस्पर्शी अभ्यास करणे म्हत्वाचे, गरजेचे!

मूळ प्रतिक चिन्ह 

माझ्या कल्पनेतील प्रतिक चिन्ह -१

माझ्या कल्पनेतील प्रतिक चिन्ह-२ 

माझ्या कल्पनेतील प्रतिक चिन्ह-३

माझ्या कल्पनेतील प्रतिक चिन्ह-४ 

माझ्या कल्पनेतील प्रतिक चिन्ह-५ 

माझ्या कल्पनेतील प्रतिक चिन्ह-६ 

ऑलिंपिकच्या चिन्हातील पाच वर्तुळ, त्यांची रचना 

आणि त्यांचे रंग, हे सारे अर्थपूर्ण आहे. 

तथापि मी या चित्रात ही पाचही वर्तुळ एकमेकांपासून 

विलग केलेली दिसत आहे. 

तथापि नीट पाहिले तर दिसेल, ही पाचही वर्तुळ,

रंगांच्या माध्यमातून परस्परांना जोडली गेलेली आहेत.

मूळ चिन्हात प्रत्येक वर्तुळ, बाजूच्या एक किंवा दोन 

वर्तुळांशी जोडली गेलेली आहेत.

तथापि मी काढलेल्या या चित्रांत प्रत्येक रंग हा 

उरलेल्या चारही रंगांशी जोडला गेलेला आहे!

ऑलिंपिक ज्योत अशीच अखंड तेवत राहो! 

ll इति ऑलिंपिक पुराणम् ll 

🏃‍♀️🤾‍♀️🏋️‍♀️🚴‍♂️

©️आनंदी पाऊस

(काही अनुभवलेलं...)

ऑलिंपिक२०२४