💃गुलाबाईची गाणी💃 (गच्चीवरील गमती जमती )

💃गुलाबाईची गाणी💃

(गच्चीवरील गमती जमती )

💃💃💃💃💃💃💃💃💃💃

💃गुलाबाईची गाणी💃

पहिली गं गुलाबाई देवा देवा साथ दे

साथीला खंडोबा खेळी खेळी खंडोबा

खंडोबाच्या दारी बाई वर्षां वर्षां अवसणी

अवसणीचं पाणी जसं गंगेचं पाणी

गंगेच्या पाण्याने वेळवीला भात

जेविता कंठ राणा गुलाबाईचा.

ठोकीला राळा हनुमंत बाळा

हनुमंत बाळाचे लांब लांब झोके

टिकाऊचे डोळे हात पाय गोरे

भाऊ भाऊ टकसनी माथापुढं झळसणी

झळकतीचे एकच पान

दुरून गुलाबाई नमस्कार

एवढीशी गंगा झुळझुळ वाहे

ताव्या पितळी नाय गं

हिरवी टोपी हाय गं

हिरवी टोपी हरपली सरपाआड लपलो

सरपदादा बेटिले जाई आंवा पिकला

जाई नव्हे जुई नव्हे चिंचाखालची रानुबाई

चिंचा तोडीत जाय गं पाच पानं खाल्ली गं

खाता खात रंगली तळय़ात घागर बुडाली

तळय़ा तळय़ा ठाकुरा

गुलाबाई जाते माहेरा

जाते तशी जाऊ द्या

तांव्याभर पाण्याने न्हाऊ द्या

बोटभर कुंकू लावू द्या

तांबडय़ा घोडय़ावर बसू द्या

तांबडय़ा घोडय़ाचे उलटे पाय

आउले पाऊल नागपूर गांव

नागपूर गावचे ठासे ठुसे

वरून गुलाबाईचे माहेर दिसे.

💃💃💃💃💃💃💃💃💃💃💃

सा बाई सु, सा बाई सु,

बेलाच्या झाडाखाली

महादेवा तू रे महादेवा तू

हार गुंफिला, विडा रंगीला

झेंडुची फुले माझ्या गुलाबाईला रे

माझ्या गुलाबाईला॥

सा बाई सु, सा बाई सु,

बेलाच्या झाडाखाली

महादेवा तू रे महादेवा तू

हार गुंफिला, विडा रंगीला

गुलाबाचे फूल माझ्या गुलाबाईला रे

माझ्या गुलाबाईला॥

सा बाई सु, सा बाई सु,

बेलाच्या झाडाखाली

महादेवा तू रे महादेवा तू

हार गुंफिला, विडा रंगीला

मोगऱ्याची फुले माझ्या गुलाबाईला रे

माझ्या गुलाबाईला.

(अशी सगळ्या फुलांची नावे घालून हे गाणे कितीही लहान किंवा मोठे

करता येते, वेळ असेल त्याप्रमाणे)

💃💃💃💃💃💃💃💃💃💃

अक्कण माती चिक्कण माती

अश्शी माती सुरेख बाई जातं ते रोवावं

अस्सं जातं सुरेख बाई सपिटी दळावी

अश्शी सपिटी सुरेख बाई करंज्या कराव्या

अश्शा करंज्या सुरेख बाई तबकी ठेवाव्या

अस्सं तबक सुरेख बाई शेल्याने झाकावं

अस्सा शेला सुरेख बाई पालखी ठेवावा

अश्शा पालखी सुरेख बाई माहेरी धाडावी

अस्सं माहेर सुरेख बाई खेळाया मिळतं

अस्सं सासर द्वाड बाई कोंडूनी मारितं. आपे दूध तापे, त्यावर पिवळी साय,

लेकी गुलाबाई साखऱ्या लेवून जाय

कशी लेवून जाय, कशी लेवू दादा,

घरी नंदा जावा, करतील माझा हेवा

नंदाचा बैल येईल डोलत,

सोन्याचं कारलं साजीरं बाई, गोजीर.

💃💃💃💃💃💃💃💃💃💃

नंदा भावजया दोघीच जणी बाई दोघीच जणी,

शिंक्यावरचं लोणी खाल्लं कुणी खाल्लं कुणी

तेच खाल्लं वहिनींनी, वहिनींनी,

आता माझे दादा येतील गं, येतील गं,

दादाच्या मांडीवर बसेल, बसेल,

दादा तुमची बायको चोट्टी चोट्टी

असू दे माझी चोट्टी चोट्टी

घे काठी लगाव पाठी

घरादाराची लक्षी मोठ्ठी मोठ्ठी ॥

💃💃💃💃💃💃💃💃💃💃💃

यादवराया राणी रुसून बसली कैसी

सासुरवाशीण सून घरासी येईना कैसी

सासुबाई गेल्या समजावयाला

चला चला सुनबाई आपुल्या घराला

अर्धा संसार देते तुम्हाला

अर्धा संसार नक्को मला

मी नाही यायची तुमच्या घराला

यादवराया राणी रुसून बैसली कैसी

सासुरवाशीण सून घरासी येईना कैसी

सासरे गेले समजवायला,

चला चला सुनबाई आपुल्या घराला

बांगड्यांचा जोड देतो तुला

बांगड्यांचा जोड नको मला,

मी नाही यायची तुमच्या घराला

यादवराया राणी रुसून बैसली कैसी

सासुरवाशीण सून घरासी येईना कैसी

नणंद गेली समजवायला

चलाचला वहिनीबाई आपुल्या घराला

सोन्याचा हार देते तुम्हाला,

सोन्याचा हार नको मला,

मी नाही यायची तुमच्या घराला

यादवराया राणी रुसून बैसली कैसी

सासुरवाशीण सून घरासी येईना कैसी

दीर गेला समजवायला,

चलाचला वहिनीबाई आपुल्या घराला,

बाजूबंदाचा जोड देतो तुम्हाला,

बाजूबंदाचा जोड नक्को मला,

मी नाही यायची तुमच्या घराला

यादवराया राणी रुसून बैसली कैसी

सासुरवाशीण सून घरासी येईना कैसी

नवरा गेला समजवायला,

चलाचला आपुल्या घराला,

मंगळ सूत्रांचा जोड देतो तुला,

मंगळ सूत्रांचा जोड हवा मला,

मी येते आपुल्या घराला,

यादवराया राणी रुसून बैसली कैसी

सासुरवाशीण सून घरासी येईना कैसी

💃💃💃💃💃💃💃💃💃💃

एक लिंबू झेलू बाई दोन लिंबू झेलू

दोन लिंबू, झेलू बाई

तीन लिंबू झेलू,

तीन लिंबू झेलू बाई,

चार लिंबू झेलु,

चार लिंबू झेलु बाई

पाच लिंबू झेलू

पाच लिंबाचा पानोठा

माळ घालू हनुमंता

हनुमंताची निळी घोडी

येता जाता कमळे तोडी

कमळाच्या पाठीमागे

असं पुढे चालत रहायचं.

💃💃💃💃💃💃💃💃💃💃

अडकित जाऊ, खिडकीत जाऊ,

खिडकीत होता बट्टा

गुलाबाईला मुलगा झाला, नाव ठेवा

दत्ता….

अडकित जाऊ, खिडकीत जाऊ,

खिडकीत होता ताम्हण

गुलाबाईला मुलगा झाला नाव ठेवा

वामन…

अडकीत जाऊ खिडकीत खिडकीत

होती बशी

गुलाबाईला मुलगी झाली नाव ठेवा

शशी…

अडकित जाऊ खिडकीत जाऊ

खिडकीत होते कमळ

गुलाबाईला मुलगी झाली, नाव ठेवा

विमल…

अडकित जाऊ खिडकीत जाऊ,

खिडकीत होते विडे

गुलाबाईला मुलगा झाला गावात वाटा

पेढे.

(अशी वेगवेगळ्या वस्तूंची नावे घालून हे गाणे कितीही लहान किंवा मोठे

करता येते, वेळ असेल त्याप्रमाणे)

💃💃💃💃💃💃💃💃💃💃

कारल्यांचा वेल लाव गं सुने लाव गं सुने

मग जा आपुल्या माहेरा माहेरा

कारल्याचा वेल लावला हो सासुबाई

लावला हो सासुबाई

आता तरी जाऊ का माहेरा माहेरा

कारल्याला कारली येऊ दे गं सुने येऊ

दे गं सुने

मग जा आपुल्या माहेरा माहेरा

कारल्याला कारले आली हो सासुबाई

आली हो सासुबाई

आता तरी जाऊ का माहेरा माहेरा…

कारल्याच्या भाजी कर गं सुने कर गं सुने

मग जा आपुल्या माहेरा माहेरा…

कारल्याची भाजी केली हो सासुबाई

केली हो सासुबाई

आता तरी जाऊ का माहेरा माहेरा…

कारल्याची भाजी खा गं सुने खा ग सुने

मग जा आपुल्या माहेरा माहेरा…

कारल्याची भाजी खाल्ली हो सासुबाई

खाल्ली हो सासुबाई

आता तरी जाऊ का माहेरा माहेरा…

आपलं उष्ट काढ गं सुने काढ गं सुने

मग जा आपुल्या माहेरा माहेरा

आपलं उष्ट काढलं हो सासूबाई काढलं

हो सासुबाई

आता तरी जाऊ का माहेरा माहेरा….

आणा फणी घाला वेणी जाऊ द्या राणी

माहेरा माहेरा

आणली फणी घातली वेणी गेली राणी

माहेरा माहेरा.

💃💃💃💃💃💃💃💃💃💃