🪔🌺माऊली लिखाणाबद्दल थोडे...🌺🪔 (featured)

🪔🌺माऊली लिखाणाबद्दल थोडे...🌺🪔

(featured) 

                              माउलींवर लिखाण करावे, हे गेल्या दोन वर्षांपासून मनात होते. तेव्हा सुरुवातही केली, पण काय कारणाने ते राहूनच गेले याचा पूर्ण विसर पडला. तथापि मे महिन्यात एक अमृतयोग आला, काही अतिशय खास कारणाने आळंदीला जाण्याचा! आळंदीहून परतल्यावर मात्र हे लिखाण परत नव्याने सुरु झाले आणि अगदी काही कळायच्या आतच पूर्णत्वाकडे गेले, म्हणजे संजीवन समाधी पर्यंत गेलेही. 

सगळे संदर्भ ग्रंथ कपाटात परत ठेऊनही दिले. तथापि मन काही केल्या या सगळ्यातून बाहेर येण्यास तयार नव्हते. तिथेच रेंगाळत राहिले, पांडुरंग जसा समाधी स्थानातच रेंगाळून राहिला, तसेच. मात्र मला या सगळ्यातून बाहेर येण्यासाठी दुसऱ्या कुणाचीही मदत शक्य नव्हती. माझे मलाच निवृत्तीनाथ बनून, बाहेर पडायला हवे होते. तसेच हे लेखन चालू असतांना काही वाचकांचे काही प्रश्नही येत होते, त्यांचेही खुलासे करायचे होते. या सगळ्यावर उपाय म्हणजे हे सगळे परत शब्दांत मांडायचे. या सगळ्या कारणांमुळे हा लेखन प्रपंच!

या लेखनाचा सगळ्यात महत्वाचा भाग म्हणजे, या लेखनासाठी वापरलेले संदर्भ ग्रंथ. या सगळ्याबद्दल समाधी पर्वाच्या शेवटी लिहावे असे ठरविले होते. तथापि समाधी पर्वाच्या शेवटी हे सगळे लिहिण्याची ना माझी मनस्थिती होती, ना वाचकांची असणार होती. त्यामुळे ती सगळी माहिती तिथे दिली नव्हती. आता मात्र इथे देते. 

 ज्ञानेश्वर माऊलींबद्दल सगळ्या माहितीचा सगळ्यात मूळ स्त्रोत म्हणजे नामदेवांचे लिखाण. भावार्थ दीपिका लोकार्पण सोहळ्यापासून ते समाधीपर्यंत नामदेवांनी स्वतः सगळे प्रत्यक्ष अनुभवले होते. त्यामुळे माऊलीच्या संदर्भातील सगळ्या माहितीचा पूर्ण विश्वासाहार्य स्त्रोत म्हणजे संत नामदेवच.

मी माझे लिखाण करतांना मात्र खालील संदर्भ अभ्यासून केलेलं आहे.

१. मोरवंचीकर रा. श्री.; प्रतिष्ठान ते पैठण, विद्या बुक्स पब्लिशर, संभाजीनगर(औरंगाबाद)

२. मोरवंचीकर रा. श्री.; येई परतुनि ज्ञानेश्वरा, विद्या बुक्स पब्लिशर्स, संभाजीनगर(औरंगाबाद)

३. मोरवंचीकर रा. श्री.; समाधीतील स्पंदने, विद्या बुक्स पब्लिशर्स, संभाजीनगर(औरंगाबाद)

४. मोरवंचीकर रा. श्री.; अरुपाचे रूप, विद्या बुक्स पब्लिशर्स, संभाजीनगर(औरंगाबाद)

    तसेच सतत चर्चा, आदरणीय ऋषितुल्य डॉ रा. श्री. मोरवंचीकर सरांशी. ती कायमच चालूच असते. 

                        दुसरे महत्वाचे म्हणजे हे लिखाण, खरतरं माझ्या स्वतः साठी करणार होते. माऊलींना पूर्णत्वाने समजून घ्यायचे असेल, तर सगळ्यात आधी  त्यांचे जीवन आणि जीवनात घडलेल्या, म्हणण्यापेक्षा सर्वज्ञात घटना/चमत्कार कालक्रमाने तसेच सगळ्या सविस्तर माहितीसह, डोळ्यासमोर लख्ख असायला हवे. तरच पुढचा अभ्यास करणे आणि माउलींच्या जवळपास जाण्याचा योग्य मार्ग मिळेल आणि सुकर होईल. तथापि स्वतः साठी अभ्यास करणे वेगेळे आणि जगभरातील वाचक वाचतील या दृष्टीने अभ्यास करून, लेखन करणे यात खूप अंतर आहे. दुसऱ्या प्रकारे अभ्यास केल्यास तो जास्त सावध आणि जागरूक, सखोल होईल असे मला वाटले. तसेच हा योग्य पद्धतीने केलेला अभ्यास, माहिती जास्तीत जास्त वाचकांपर्यंत पोहोचावी असेही वाटले. झालेही तसेच. या कारणांनी माझा अभ्यास अतिशय योग्य रीतीने आणि सूक्ष्म, सखोल, सर्वस्पर्शी होण्यास छान मदत झाली. पुढेही असाच छान अभ्यास होईल अशी खात्री वाटते. या करिता आपणा सर्व वाचकांचे अतिशय स्नेहाळ आनंदी धन्यवाद!

अगदी वास्तव दृष्टीने विचार केल्यास, माऊली जीवनातील फारच थोड्या, बोटावर मोजण्या इतक्या घटना वास्तवात घडू शकतात अशा आहेत. बाकी उर्वरित सगळे चमत्कार! जे आपल्याला अगदी नकळत्या वयापासून कानावर पडत असतात आणि आपल्याला त्या खऱ्या घटना वाटत असतात. तथापि चमत्कार सदृश्य घटनांकडे अधिक डोळस नजरेने पाहणे, अभ्यासणे जास्त गरजेचे आहे/वाटते. तथापि हा अभ्यासाचा एक अतिशय व्यापक आणि स्वतंत्र विषय आहे. त्याबद्दल सुद्धा मला माझे विचार मांडायचे आहेत. त्यास थोडा अवधी लागेल. किंबहुना पुरेसा वेळ घेऊन, देऊनच हा विषय अभ्यासावा, चिंतावा, विचार करावा आणि मगच लेखन करावे असा आहे. आशा करते हे ही लेखन लवकरच पूर्णत्वास जाईल. 

                  काही वाचकांना एखाद्या घटनेबद्दल किंवा गोष्टीबद्दल सखोल, सविस्तर माहिती हवी होती. मालिकेचे नावच "माऊली : जीवन घटनाक्रम" आहे. त्यामुळे त्यात फक्त महत्वाच्या घटना/चमत्कार यांचा कालक्रमाने उल्लेख आणि त्या समजण्यासाठी जी पूरक माहिती अपेक्षित होती, ती आणि तेव्हढीच देण्याचा मी प्रयत्न केलेला आहे. अन्यथा प्रत्येक घटनेवरच एक भाग, याप्रमाणे अतिशय लांबलचक लेख मालिका झाली असती. परंतु, प्रत्येक घटना ज्ञात आहे, त्यापलीकडे जाऊन ती समजून घेणे, तिच्या वास्तवात जाणे म्हणजे अतिशय सखोल संशोधनात्मक काम करावे लागेल. जे वाटते, त्यापेक्षा अतिशय अवघड काम आहे. ते ही करण्याचा मी प्रयत्न करणारच आहे. असो. 

                       इथेच थांबते. अन्यथा या सगळ्यातून बाहेर पडण्याकरिता हे लेखन करायला घेतले खरे, तथापि हे लेखन जितके लांबत जाईल, तितके यातून बाहेर पडणे अवघड...

न्यून ते पुरते, अधिक ते सरते करून घ्यावे..... 

🪔🌺सारेच माऊली चरणी अर्पण... 🌺🪔

🪔🪔🪔

🙏🙏🙏

🙇‍♀️🙇‍♀️🙇‍♀️

आनंदी पाऊस 

(featured)

६ जुलै २०२३