🐍नागपंचमी विशेष 🐍 (चित्रं मालिका)

🐍नागपंचमी विशेष🐍 

(चित्रं मालिका) 

🌦️🌧️श्रावण मासी हर्ष मानसी हिरवळ दाटे चोहीकडे

क्षणात येते सरसर शिरवे क्षणात फिरुनी उन पडे

वरती बघता इंद्रधनुचा गोफ दुहेरी विणलासे

मंगल तोरण काय बांधले नभोमंडपी कुणी भासे

झालासा सूर्यास्त वाटतो सांज अहाहा तो उघडे

तरू शिखरांवर, उंच घरांवर पिवळे पिवळे ऊन पडे

उठती वरती जलदांवरती अनंत संध्या राग पहा

पूर्ण नभांवर होय रेखिले सुंदरतेचे रूप महा

बलाक माला उडता भासे कल्प सुमनची मालाची ते

उतरुनि येती अवनीवरती ग्रहगोलाची की एकमते

सुंदर परडी घेऊनि हाती पुरोपकंठी शुध्दमती

सुंदर बाला त्या फुल माला रम्य फुले पत्री खुडती

सुवर्ण चंपक फुलाला विपिनी रम्य केवडा दरवळला

पारिजातहि बघता भामा रोष मनीचा मावळला

फडफड करून थकले अपुले पंख पाखरे सावरती

सुंदर हरणी हिरव्या कुरणी निजबाळांसह बागडती

खिल्लारे हि चरती रानी  गोपही गाणी गात फिरे

मंजुळ पाव गात त्याचा श्रावण महिमा एक सुरे

देवदर्शना निघती ललना हर्ष माइना हृदयात

वदनी त्यांच्या वाचून घ्यावे श्रावण महिन्याचे गीत🌦️🌧️

– बालकवी

                श्रावण महिना! अगदी लहानापासून थोरापार्यंत सगळ्यांचा अतिशय आवडता काळ. तसेच ही बालकवींची कविता सुद्धा. शाळेत असतांना पाठ झालेली, ती अगदी कायमची!  निसर्ग अगदी भरभरून आनंद देतो या काळात. तसेच भरपूर सण-व्रत-वैकल्ये, सगळ्यांचीच अतिशय धामधूम असणारा काळ! नुकताच श्रावण सुरु झालाय. श्रावणातील पहिला सण म्हणजे नागपंचमी.  नागपंचमी म्हणजे नाग-पूजन!  अगदी पूर्वापार चालत आलेला सण. पूर्वापार म्हणजे नक्की कधीपासून सुरु झाला, याबद्दल माझा अभ्यास पूर्णत्वास गेला की आपल्या सगळ्यांपर्यंत येईलच. 

                 नागपंचमी बद्दलची जुजबी माहिती थोडं गोडाचं-३ (https://www.anandipavus.com/2020/08/blog-post.html) या भागात दिलीच आहे. त्यामुळे आता परत इथे त्याचा उल्लेख करत नाही. साप, नाग आणि इतर सरपटणारे प्राणी बघायला मला अजिबातच आवडतं नाही. म्हणजे चित्रात, दूरदर्शनवर अथवा प्रत्यक्षपणे प्राणी संग्रहालयात. अगदी कुठल्याच प्रकारे नाही. जर पाहिलेच तर मात्र रात्री स्वप्नातही ते दिसतातच मला हमखास आणि एक विचित्र जाणीव होते, अस्वस्थ वाटते झोपेत आणि नंतर दिवसा सुद्धा. त्यामुळे हे सगळे बघणे मी कायमच टाळते. प्राणी संग्रहालयात सुद्धा गेले, तरी तो भाग सोडून बाकीचे बघते. तथापी मी ही काही नागांची चित्र काढली आहेत. सुरवातीला काढतांना सुद्धा थोडे अस्वस्थ वाटतच होते. पण नंतर मात्र ही चित्रं आवडू लागली. पण अर्थातच फक्त ही चित्रच. बाकी दुसरे कुठलेही चित्रं किंवा अन्य माध्यमात नाग/साप बघायला मला अद्यापही आवडत नाहीच. आज नागपंचमी निमित्त ही सगळी चित्रं आपल्या सगळ्यांसाठी इथे प्रकाशित करत आहे. 

🐍नागपंचमीच्या शुभेच्छा!🐍

गारुडी-नाग शिल्पं, पुष्करिणी, मंड्या, कर्नाटक 

नागाची रांगोळीत्मक रचना

मध्यंतरी एका शाळेत खास शिक्षिकेचे काम करत 

असतांना, मुलांना हे नागाचे चित्र काढून दिले होते.

त्यांना ते रंगविण्यास सांगितले होते.

मग मी सुद्धा त्यांच्या बरोबर हे चित्र रंगविले.

आठ नागांची रचनेची नक्षी 

गोंड शैलीतील नाग 

दोन नागांची रांगोळी!

साप उगाचच कुणालाही दंश करीत नाही. वर्षानुवर्षे मेहनत केलेली शक्ती म्हणजे विष तो फुकट घालत नाही. आपणही जीवनात काही तप करून मिळवलेली शक्ती एखाद्याला रागवण्यात किंवा हैराण करण्यात कशाला खर्च करायची. सापाला सुगंध आवडतो प्रत्येक मानवाच्या जीवनातून सदगुणांचा सुगंध व सुविचारांचा सुगंध दरवळतो तो सुगंध आपल्याला प्रिय असला पाहिजे. साप बिळात राहतो एकांत अनुभवतो मोक्षाची इच्छा असणाऱ्याने जनसमूहापासून दूर राहिले पाहिजे.

वरील माहिती माझी मैत्रिण सुरेखा महालपुरे यांनी दिली आहे 

©️®️आनंदी पाऊस 

(चित्रं मालिका)

१८ ऑगस्ट २०२३