🌧️💧💦😇आनंदी पावसासोबत मनमोकळ्या गप्पा😇💦💧🌧️ (featured)

 🌧️💧💦😇आनंदी पावसासोबत मनमोकळ्या गप्पा😇💦💧🌧️ 

(featured)

               आनंदी पावसाचे मनोगत! त्याच्या जन्म कसा, केव्हा झाला अशा बऱ्याच गोष्टींचा तपशील आज पर्यंत अनेक लेखांमधून या ना त्या कारणाने येत गेला. तथापि सलग तासभराचा गप्पांचा कार्यक्रम किंवा ध्वनीफीत स्वरूपात मात्र उपलब्ध नव्हता. आज मात्र हा मनमोकळ्या गप्पांचा कार्यक्रम ध्वनिफीत स्वरूपात उपलब्ध झालेला आहे. त्याची यु-ट्युब लिंक खाली दिलेली आहे. त्यावर जाऊन आपणास ती ऐकता येईल. 

               आता थोडे या गप्पांबद्दल. तर माझी अगदी सख्खी मैत्रीण, वास्तूविद्या महाविद्यालयातील वर्ग मैत्रीण, आता बारामतीच्या वास्तुविद्या महाविद्यालयात, प्राध्यापक आणि शैक्षणिक प्रमुख अशा दुहेरी भूमिकेत कार्यरत आहे. आपली सख्खी मैत्रीण, तिची कार्यभूमी, तिचे शैक्षणिक कार्यात योगदान हे सारे मला कौतुकाने प्रत्यक्ष बघण्याची अगदी मनापासून इच्छा होती. तसेच तिनेही बऱ्याचदा त्यांच्या महाविद्यालयात येण्याचे आमंत्रण दिले होते. परंतु योग आल्याशिवाय कुठलीही गोष्ट तडीस जात नाही.

               अखेरीस तो योग जुलै महिन्याच्या अखेरीस आला. मी तिच्या सोबत त्यांच्या महाविद्यालयात दाखल झाले. येण्या आधीच तिने सांगितले होते, तुझ्या संशोधना संदर्भात किंवा आनंदी पावसा संदर्भात आमच्या विद्यार्थ्यांना एखादे व्याख्यानं देऊन त्यांच्याशी संवाद साधला तर आम्हाला फार आवडेल. माझा सततचा अभ्यास आणि त्यामध्ये काही शोधनिबंधाचे लेखन आणि सादरीकरणाचे काम चालूच असते. त्यामुळे मी सांगितले यावेळी संशोधन वगैरे थोडे बाजूला ठेवू आणि आनंदी पावसाबद्दल छान मनमोकळ्या गप्पा मारू या. तिने मान्य केले! ३१ जुलै २०२५ रोजी सायंकाळी महाविद्यालयाच्या इमारतींच्या मधोमध असलेल्या मोकळ्या आवारात हा गप्पांचा कार्यक्रम पार पडला. हे आवार म्हणजे विविध प्रकारची छोटी-मोठी झाडं, त्याभोवती बसायला कट्टे, हिरवेगार गवत, काही भागावर फारश्या लावलेल्या, अशी अतिशय सुरेख रचना! अगदी वास्तुविद्या महाविद्यालयाला साजेशी! या आवारात फरशा लावलेल्या भागात आम्ही सारे स्थानापन्न झालो. अतिशय सुंदर, टवटवीत, प्रसन्न असे वातावरण, सारे नैसर्गिक, अगदी कसल्याही प्रकारच्या कृत्रिमतेचा स्पर्श नसलेले वातावरण! गप्पांचा कार्यक्रम लक्षपूर्वक ऐकला तर ह्या साऱ्याचा प्रत्यक्ष अनुभवच येईल. मध्येमध्ये निरनिराळ्या पक्षांच्या शिळ ऐकू येतील...

                अशा या आनंददायी वातावरणात हा गप्पांचा कार्यक्रम सुरु झाला. माझी ओळख करून देताना अगदी आमच्या दोघींच्या पहिल्या भेटीपासून सुरुवात झाली. मध्ये गेलेल्या एका मोठ्या काळाचा भागच जणू परत जगण्याची, अनुभवण्याची स्वर्गीय संधीच मिळाली! काही गोष्टींचा मला विसर पडला होता, तथापि तिच्या बोलण्यात आला, तसतसा मलाही आठवू लागले. त्यातून जो काही आनंद मिळाला तो अगदी शब्दांच्या पलीकडला! अवर्णनीय! पुढे आनंदी पाऊस, त्याबद्दलच्या, त्यातील निरनिराळ्या विषयांवर दिलखुलास गप्पा सुरु झाल्या. अगदी एखाद्या सुंदर, नैसर्गिक धबधब्या प्रमाणे, गप्पांचा अखंड ओघ चालू होता. तथापि वेळेचे बंधन असतेच, ते असायलाच हवे. आनंदी पावसात सर्वांसोबत मी सुद्धा पुन्हा नव्याने चिंब झाले. पाऊस आणि चहाचे अजोड नाते. आनंदी पावसात चिंब झाल्यावर वाफाळत्या चहा सोबत कार्यक्रमाची सांगता झाली...

               आपण आपले शाळा-महाविद्यालय काळातील दिवस आठवले, तर आपल्याही शाळा-महाविद्यालयात कुणी कुणी अतिथी येत असतं. आपल्याला त्यांचे बोलणे-असणे फार आवडून जात असे, तथापि आदरयुक्त भीती पोटी आपण, आपली कितीही इच्छा असली तरी त्यांच्याशी बोलू शकत नसू. नंतर मात्र अनऔपचारिक वातावरणात त्यांची भेट झाली की मात्र आपण ती संधी दवडत नसू. तसेच काहीसे झाले. कार्यक्रमा दरम्यान हजर असलेल्या विद्यार्थ्यांना माझ्याशी संवाद साधण्याची संधी दिली, तेव्हा कुणी संवाद साधण्याचा प्रयत्न केला नाही.

               तथापि कार्यक्रम संपल्यावर मात्र, मी इमारतीच्या प्रवेशद्वाराशी असलेल्या छज्ज्यात उभी होते. तेव्हा मात्र सगळ्या मुली माझ्याजवळ आल्या, मला तिथे असलेल्या कट्ट्यावर बसण्याची विनंती केली. नुकत्याच झालेल्या कार्यक्रमा बद्दल, तसेच माझे लेखन, लेखन प्रवास या बद्दल भरभरून बोलू लागल्या. इतकेच नव्हे तर आम्हाला हा कार्यक्रम फार आवडला आणि तुम्ही परत आलात तर आम्हाला आवडेल. तुम्ही परत या वगैरे सांगू लागल्या! विद्यार्थ्यांशी संवाद साधतांना वक्ता कितीही ज्ञानी असो, कितीही उत्तम वक्ता असो, परंतु वक्ता आणि विद्यार्थ्यांमध्ये एक प्रकारची जवळीक, एक सामान धागा जर निर्माण होऊ शकत नसेल तर सारेच व्यर्थ, असे मला वाटते. त्या दिवशी मात्र माझ्याशी संवाद साधणाऱ्या विद्यार्थिनी मला, तुम्ही परत आलात तर आम्हाला आवडेल असे सांगत होत्या. त्या अर्थी मी जे काही बोलत/सांगत होते, ते त्या साऱ्यांच्या आत पोहोचत होते, याची जाणीव झाली. तेव्हा कुठे हा कार्यक्रम खऱ्या अर्थाने पूर्णत्वास गेल्याचे आंतरिक समाधान मिळाले...

एक स्वर्गीय आनंदी क्षण...

ह्या लिंक वर जाऊन हा गप्पांचा कार्यक्रम ऐकता येईल!

https://youtu.be/4V9rrrhemTw?feature=shared

(ही लिंक कॉपी करून गुगल मध्ये किंवा यु ट्यूब मध्ये पेस्ट करून हा गप्पांचा कार्यक्रम ऐकता येईल.

किंवा मला कळविले तर मी लिंक शेअर करू शकते)

©️®️आनंदी पाऊस 

(featured)

२९ ऑगस्ट २०२५