वस्तु - पाळणा (माझा वारसा )

 

वस्तू - पाळणा 

(माझा वारसा )

                              खरंतर हा पाळणा खूप काही कलात्मक वगैरे अजिबातच नाही . पण एका दृष्टीने फारच विशेष आहे . कसा ते पुढे कळेलच . तर हा पाळणा माझ्या वडिलांचा , त्यांच्या जन्माच्या वेळी , त्यांच्या आजोळहुन आलेला . म्हणजे त्यांचाच वयाचा , ऐशीं वर्षाचा ! ते त्यांच्या बालपणी याच पाळण्यात झोपले . त्यांनतर त्याचे दोन्ही धाकटे भाऊ सुद्धा यातच झोपले . आमचे त्याकाळापासून एकत्र कुटुंब . आजोबा आणि त्यांचे धाकटे भाऊ , दोघांची कुटुंब एकत्र . त्यामुळे धाकट्या आजोबांच्या दोन मुली आणि चार मुलं , ही सगळी मंडळी सुद्धा यातच झोपली आपापल्या बाळपणी . 

                              त्यानंतर आमची पिढी . परत तिन्ही भावांचे एकत्र कुटुंब . सगळे मिळुन आम्ही सात बहिणी आणि दोन भाऊ . आम्ही सगळे सुद्धा आमच्या बालपणी या पाळण्यातच झोपलो . तसेच थोरल्या आत्याच्या दोन मुली सुद्धा याच पाळण्यात झोपल्या त्यांचा बालपणी . शिवाय धाकट्या आत्याची मुलगी सुद्धा यातच झोपली तिच्या बालपणी !

                                आमच्या नंतर आमची मुलं , म्हणजे त्यांची नातवंड . त्यापैकी सात नातवंड आपापल्या बालपणी या पाळण्यातच झोपली . अशी जवळ जवळ अठ्ठावीस बाळं आपापल्या बालपणी या पाळण्यात झोपली आहेत . आम्ही तर मोठे झालो पण घरात एक नी एक बाळ असेच , त्यामुळे पाळणा बऱ्यापैकी कायम टांगलेलाच असे . मग आमचा धाकटा काका आम्हा सगळ्यांना त्या पाळण्यात  बसवायचा स्वतः पाळण्याच्या समोरच्या दांडीवर बसायचा किंवा उभा राहायचा आणि जोरात झोका घ्यायचा . पोटात जाम डचमळत असे आमच्या , मग आम्ही जोरात आरडा ओरडा करत असु , मग तो अजुनच मोठ्ठा झोका घेत असे , एकदम धम्माल !

                           याच्या तळाला खाटेसारखी दोरीची वीण होती . ती मात्र वेळोवेळी खराब झाल्याने नवीन दोरीने वेळोवेळी विणावी लागत असे . आता तर दोरीने न विणता नवार आणुन विणलेली आहे . विणायला सोप्पी आणि झोपणाऱ्या बाळालाही टोचणार नाही अशी . तसेच त्याचा रंग पण खराब होत असे , मग अधुन मधुन काही वेळा त्याला रंग सुद्धा दिलेला आहे . याच्या चारही बाजूच्या आडव्या लाकडी दांड्यांच्या(बार) मध्ये छोटे छोटे थोडे कलात्मक उभे दांडे(बार) सुद्धा होते . ते एक एक करत निघून गेले , तुटून गेले , ते मात्र परत नाही बसविले . 

                         हा पाळणा छताला असलेल्या कड्यांना टांगला जात असे . तो टांगण्यासाठी त्याला लोखंडी छोटे छोटे बार होते , एकमेकांत अडकवलेले . यापैकी काही एकमेकांत कायमचे अडकवलेले होते , तर काही काढून वेगळे करता येत होते . पण अलीकडे बऱ्याच वर्षात मला हे दिसले नाहीत . स्टीलच्या कड्यांनी किंवा सुताच्या दोरीनेच पाळणा टांगलेला आठवतोय . बहुतेक ते खराब झाले असावेत . आता सध्या हा पाळणा वापरात नसल्याने , घरातील एका माळ्यावर आहे . 

©आनंदी पाऊस 

माझा वारसा (वस्तू)

२६जून २०२०

हाच तो आमचा पाळणा !

बाळाचे फोटो नीट येतील असेच सगळे फोटो आहेत . 

खास पाळण्याचा असा फोटो नाही . 

पण शक्य होईल तेव्हा नक्की फोटो काढेन 

आणि इथे प्रकाशित करीन